Muborak Go

Maxfiylik siyosati

Kuchga kirgan sana: 24.10.2026 · Oxirgi yangilanish: 06.11.2026

Bu siyosat Muborak Go xizmati qaysi shaxsiy ma'lumotlaringizni nima uchun yig'ishi, kimga berishi, qancha saqlashi va ularni qanday o'chirishingiz mumkinligini tushuntiradi.

  • Faqat buyurtmani bajarish uchun kerak bo'lgan ma'lumotlarni yig'amiz: telefon raqami, ism, yetkazish manzili va buyurtmalar.
  • Ma'lumotlaringizni sotmaymiz va reklama uchun bermaymiz. Ilovada reklama, analitika yoki xatolik hisoboti SDK'lari yo'q.
  • Hozir to'lov faqat naqd pulda. Bank karta ma'lumotlari yig'ilmaydi.
  • Hisobingizni ilovada (Profil → Hisobni o'chirish) yoki saytda muborakgo.uz/hisobni-ochirish sahifasida o'zingiz o'chirasiz.
  • Savol va so'rovlar uchun: aloqa sahifasi.

1. Siyosat nimaga taalluqli

Muborak Go — Muborak tumanidagi restoranlardan taom buyurtma qilish va uni yetkazib berish xizmati. Siyosat muborakgo.uz sayti, Google Play'dagi «Muborak Go» Android ilovasi (uz.muborakgo.app) va App Store'dagi «Muborak Go» iPhone (iOS) ilovasi uchun amal qiladi. Matnda «biz» deganda Muborak Go xizmati tushuniladi.

Restoranlar, kuryerlar va xizmat xodimlari ma'lumotlari haqida 10-bo'limga qarang.

2. Biz bilan bog'lanish

Shaxsiy ma'lumotlar bo'yicha savol, so'rov yoki shikoyat uchun aloqa sahifasidagi formani to'ldiring va «Shaxsiy ma'lumotlar» mavzusini tanlang. Murojaatingizni xizmat xodimlari ko'rib chiqadi va siz ko'rsatgan telefon raqamiga javob beradi.

3. Qaysi ma'lumotlarni yig'amiz

  • Telefon raqami — kirishda (SMS kod bilan tasdiqlanadi) va buyurtma berganda.
  • Ism — kirishda yoki buyurtmada. Uni profilingizda o'zgartirishingiz mumkin.
  • Yetkazish manzili — ko'cha va uy, mahalla, mo'ljal, kuryer uchun izoh va xaritadagi nuqta (koordinatalar). Buyurtma berganda kiritasiz.
  • Joylashuv — faqat «Joylashuvimni aniqlash» tugmasini bosib, ruxsat berganingizda, manzilni topish uchun bir marta olinadi. iPhone ilovasi faqat «Ilovadan foydalanganda» ruxsatini so'raydi. Ilovalar fonda joylashuvingizni kuzatmaydi.
  • Buyurtmalar — taomlar, summalar, yetkazish narxi, promokod, holatlar va ularning vaqti.
  • Taomlar haqidagi baho va fikrlar — o'zingiz yozsangiz. Ular boshqa xaridorlarga ismingiz va familiyangizning bosh harfi bilan ko'rinadi (masalan, «Aziza R.»). Telefon raqamingiz ko'rsatilmaydi. Fikr e'lon qilinishidan oldin nomaqbul so'z, havola va telefon raqamlariga avtomatik tekshiriladi; shunday fikr moderator ko'rib chiqquncha boshqalarga ko'rsatilmaydi.
  • Fikrlar ustidan shikoyat va bloklash — boshqa mijozning fikri ustidan shikoyat qilsangiz: sabab, izohingiz, ismingiz va telefon raqamingiz (moderator siz bilan bog'lanishi uchun) va qaysi fikr ekani. Muallifni bloklasangiz: kimni bloklaganingiz. Bloklangan muallifga bu haqda aytilmaydi.
  • Ilova ichidagi xabarlar — sizga kelgan xabarlar, ularni qachon o'qigan, ochgan va bosganingiz, marketing roziligi yoki uni bekor qilgan vaqtingiz, qayerda bildirganingiz va siyosat versiyasi.
  • Aloqa formasi orqali yuborgan xabaringiz — ism, telefon, mavzu, buyurtma raqami (ixtiyoriy) va matn.
  • Bildirishnoma tokeni (Firebase Cloud Messaging) — Android ilovada tizimga kirganingizda, iPhone ilovada esa bildirishnomalarga ruxsat berganingizda (Apple Push Notification service tokeni Firebase orqali). Buyurtma holati va muhim xizmat e'lonlari haqida, rozilik bergan bo'lsangiz yangilik va takliflar haqida xabar yuborish uchun kerak. Ruxsat bermasangiz, token yig'ilmaydi va ilova bildirishnomasiz ishlayveradi.
  • Texnik ma'lumotlar — brauzer yoki ilova turi (User-Agent) va IP manzilning xeshi (kirishda, SMS kod so'raganda va formalarni yuborganda). Server jurnallarida IP manzil, ochilgan sahifa va vaqt qayd etiladi.
  • Brauzeringizda — kirish cookie'si (sessiya), til tanlovi (mg_lang) va savatcha (qurilmangizning o'z xotirasida).

Biz yig'maymiz: bank karta ma'lumotlari, kontaktlar ro'yxati, rasm va fayllar, SMS xabarlaringiz, reklama identifikatori, biometrik ma'lumotlar.

4. Nima uchun foydalanamiz

  • Hisobga kirish va uni himoyalash: SMS kod, urinishlar sonini cheklash.
  • Buyurtmani restoranga yetkazish, tayyorlash, yetkazib berish va holatini ko'rsatish. Yetkazish hududi va narxini hisoblash.
  • Buyurtma bo'yicha siz bilan bog'lanish: restoran yoki kuryer qo'ng'iroq qilishi mumkin.
  • Murojaatlaringizga javob berish.
  • Firibgarlik va suiiste'molning oldini olish, hisob-kitob yuritish va nizolarni hal qilish.
  • Muhim xizmat e'lonlari: texnik ishlar va xizmat uzilishi haqida.
  • Faqat roziligingiz bilan: restoran yangiliklari, yangi taomlar, haftalik TOP va takliflar haqida xabarlar.
  • Qonun talablarini bajarish.

Ma'lumotlar buyurtmangizni bajarish uchun, xizmatdan foydalanganda bergan roziligingiz asosida va qonunda nazarda tutilgan hollarda ishlanadi. Yangilik va takliflarni faqat ilovada roziligingizni bildirganingizdan keyin yuboramiz va rozilikni ilova sozlamalarida istalgan payt bekor qilishingiz mumkin. Bunday xabarni kimga yuborishni tanlashda buyurtma tarixingiz, hududingiz, til va ilova turidan foydalanishimiz mumkin. Ma'lumotlaringizni tashqi reklama tarmoqlariga bermaymiz.

5. Kimga beramiz

  • Buyurtma bergan restoraningizga — ism, telefon, yetkazish manzili, taomlar va izoh.
  • Buyurtmani olib boradigan kuryerga — ism, telefon, manzil va xaritadagi nuqta.
  • Telegram — restoran (va sozlangan bo'lsa, kuryer hamda xizmat xodimlari) yangi buyurtma haqidagi xabarni Telegram bot orqali o'z chatida oladi. Xabarda ism, telefon, manzil, xaritadagi nuqta va taomlar bor. Telegram — xorijiy xizmat.
  • USMS (usms.uz) — SMS provayderi, SMS'ni Eskiz (O'zbekiston) orqali yuboradi: kirish kodini yuborish uchun telefon raqamingiz va kod.
  • Google Firebase Cloud Messaging (Google LLC) — Android va iPhone ilovalariga bildirishnoma yetkazish uchun bildirishnoma tokeni; iPhone'ga bildirishnoma Apple Push Notification service (Apple Inc.) orqali yetkaziladi. Bildirishnoma matnida telefon raqami, manzil yoki to'lov ma'lumoti bo'lmaydi.
  • OpenStreetMap (OpenStreetMap Foundation) — xarita tasvirlari ularning serverlaridan yuklanadi. Ular qurilmangizning IP manzilini va ko'rilayotgan xarita hududini ko'radi, hisob ma'lumotlaringizni emas. Manzilni aniqlash va masofani hisoblash bizning serverimizda bajariladi.
  • Xosting va zaxira: xizmat serveri va ma'lumotlar bazasi ServerPlus (ООО «SERVER PLUS», Toshkent) xosting provayderida joylashgan. Ma'lumotlar bazasining zaxira nusxalari Cloudflare R2 (Cloudflare, Inc., AQSh) bulut omborida saqlanadi.
  • Vakolatli davlat organlariga — faqat qonunda belgilangan hollarda va tartibda.

Ma'lumotlaringizni sotmaymiz, ijaraga bermaymiz va reklama maqsadida hech kimga bermaymiz.

6. Ma'lumotlar qayerda saqlanadi

Asosiy ma'lumotlar bazasi xizmat serverida saqlanadi: provayder ServerPlus ma'lumotiga ko'ra uning VPS serverlari Toshkentdagi ma'lumot markazida joylashgan. Ma'lumotlar bazasining zaxira nusxalari (bazadagi barcha ma'lumotlar, jumladan ism, telefon va manzillar) har kuni Cloudflare R2 omboriga yuboriladi va O'zbekistondan tashqarida saqlanadi: ombor Sharqiy Yevropa mintaqasi ko'rsatmasi bilan yaratilgan, aniq ma'lumot markazini provayder tanlaydi. Telegram, Google Firebase, Apple Push Notification service va OpenStreetMap ham xorijiy xizmatlardir, shuning uchun 5-bo'limda aytilgan ma'lumotlar O'zbekistondan tashqariga uzatiladi.

Biometrik va genetik ma'lumotlarni yig'maymiz.

7. Qancha saqlaymiz

  • Hisob ma'lumotlari (ism, telefon) — hisobni o'chirmaguningizcha.
  • Kirish sessiyasi — oxirgi faollikdan keyin 400 kungacha ishlaydi, tizimdan chiqsangiz darhol tugaydi. Tugagan sessiya yozuvlari (qurilma turi va vaqtlar) hisobingiz o'chirilguncha saqlanadi.
  • SMS kod so'rovlari (telefon raqami, vaqt, IP xeshi; kodning o'zi emas, faqat uning xeshi) — 31 kun, keyin avtomatik o'chiriladi.
  • Kirish va forma yuborish urinishlari hisobi — taxminan 2 kun, keyin avtomatik o'chiriladi.
  • Bildirishnoma tokeni — tizimdan chiqsangiz yoki 60 kun yangilanmasa bekor qilinadi; bekor qilingan token yozuvi hisob o'chirilganda o'chiriladi.
  • Qurilma bo'yicha xabar yetkazish va ochish yozuvlari — 90 kun. Ilova ichidagi xabarlar — 12 oy. Marketing roziligi yozuvlari — hisobni o'chirmaguningizcha.
  • Masofa hisobi keshi (restoran va yetkazish nuqtasining taxminan 11 metr aniqlikdagi koordinatalari) — taxminan 1 soat, keyin avtomatik o'chiriladi.
  • Buyurtmalar — hisob-kitob va nizolarni hal qilish uchun saqlanadi. Hozircha ular uchun avtomatik o'chirish muddati belgilanmagan. Hisob o'chirilsa, buyurtmalardan ism, telefon va manzil olib tashlanadi.
  • Aloqa formasidagi murojaatlar — ko'rib chiqilgandan keyin ham saqlanadi. O'chirishni so'rasangiz yoki hisobingizni o'chirsangiz, o'chiriladi.
  • Server jurnallari (IP manzil, sahifa, vaqt) — 14 kungacha.
  • Zaxira nusxalar — serverda 14 kun. Bulut omboridagi nusxalar uchun hozircha avtomatik o'chirish muddati belgilanmagan. Zaxira nusxadan faqat nosozlikdan keyin ma'lumotlarni tiklash uchun foydalaniladi.

8. Hisobni o'chirish

Hisobingizni ikki yo'l bilan o'chirishingiz mumkin:

O'chiriladi: ismingiz va telefon raqamingiz, buyurtmalardagi yetkazish manzillari, taomlar haqidagi fikrlaringiz, barcha qurilmalardagi kirish sessiyalari va bildirishnoma tokenlari, ilova ichidagi xabarlar, marketing roziligi yozuvlari, SMS kod yozuvlari va shu raqamdan aloqa formasi orqali yuborilgan murojaatlar.

Saqlanadi: buyurtmalar tarixi (taomlar, summa, restoran, sana, hudud) — ism va raqamsiz, hisob-kitob uchun. Yakunlanmagan buyurtma bo'lsa, u yetkazilgach yoki bekor qilingach hisobni o'chirishingiz mumkin. Keyin shu raqam bilan kirsangiz, yangi bo'sh hisob ochiladi.

O'chirilgan ma'lumotlar eski zaxira nusxalarda zaxira saqlanadigan muddat davomida qolishi mumkin (7-bo'lim).

9. Huquqlaringiz

Siz quyidagilarni so'rashingiz mumkin:

  • qaysi ma'lumotlaringiz ishlanayotgani, nima uchun va kimga berilgani haqida ma'lumot;
  • noto'g'ri ma'lumotni tuzatish: ismni Profil'da o'zingiz o'zgartirasiz, boshqasi uchun aloqa formasiga yozing;
  • ma'lumotlarni o'chirish: hisobni o'chirish (8-bo'lim) yoki aloqa formasi orqali;
  • roziligingizni qaytarib olish: marketing xabarlari uchun ilova sozlamalarida, boshqasi uchun hisobni o'chirish yoki aloqa formasi orqali.

So'rovlar aloqa sahifasidagi forma orqali qabul qilinadi («Shaxsiy ma'lumotlar» mavzusi). Shaxsingizni tasdiqlash uchun sizga murojaatda ko'rsatilgan raqamdan qo'ng'iroq qilishimiz yoki SMS yuborishimiz mumkin. Javobimiz sizni qoniqtirmasa, shaxsiy ma'lumotlar sohasidagi vakolatli davlat organiga murojaat qilishingiz mumkin.

10. Restoranlar, kuryerlar va xodimlar

  • Restoran va kuryer bo'lish uchun arizalar — ism, telefon va formadagi boshqa ma'lumotlar. Ularni faqat xizmat xodimlari ko'radi.
  • Restoran hisoblari — login, ism va telefon. Restoran nomi, manzili va menyusi saytda hammaga ko'rinadi.
  • Kuryerlar — ism, telefon, transport turi va ish holati. Smena davomida joylashuv buyurtmalarni taqsimlash va mijozga kuryerni xaritada ko'rsatish uchun yuboriladi. Har bir kuryerning faqat oxirgi joylashuvi saqlanadi. Joylashuv tarixi yoqilgan bo'lsa, u 7 kundan keyin o'chiriladi.
  • Xizmat xodimlarining amallari xavfsizlik uchun jurnalga yoziladi.

11. Xavfsizlik

  • Sayt va ilova bilan aloqa faqat HTTPS orqali, shifrlangan holda.
  • SMS kodlar va kirish sessiyasi kalitlari bazada ochiq holda emas, xesh ko'rinishida saqlanadi. IP manzillar xesh ko'rinishida yoziladi.
  • Android ilovada kirish sessiyasi qurilmada shifrlangan holda saqlanadi va zaxira nusxaga ko'chirilmaydi. iPhone ilovada sessiya ilovaning o'z, boshqa ilovalar o'qiy olmaydigan xotirasida saqlanadi.
  • iPhone ilovasida reklama identifikatori (IDFA) so'ralmaydi va foydalanuvchini boshqa ilova va saytlarda kuzatish (App Tracking Transparency) qilinmaydi.
  • Xodimlar faqat o'z vazifasi uchun kerakli bo'limlarga kiradi.
  • Ilova jurnallarida telefon raqamlari, tokenlar va parollar yashiriladi.

Hech qanday tizim to'liq xavfsiz emas. Ma'lumotlaringiz tarqalib ketgani aniqlansa, qonunda belgilangan tartibda harakat qilamiz.

12. Siyosatdagi o'zgarishlar

Xizmat o'zgarsa, bu siyosat yangilanadi va yuqoridagi «Oxirgi yangilanish» sanasi o'zgaradi. Amaldagi matn har doim shu sahifada: muborakgo.uz/maxfiylik. Shuningdek qarang: Foydalanish shartlari.